Sipi 1 Isyu 4 Hunyo 2005

Hunyo 19, 2005 – Sa ganap na 12:01 ng madaling araw ay inumpisahan na ang pagtatala ng mga kapatid at magulang na may edad labing lima (15 yrs. Old) pataas para sa gaganaping halalan ng bubuo ng Kataastaasang Sanggunian.

Ang mga namuno sa halalal o Comelec Officials ay pinangunahan ng Kapatid Precy Ramoran ng Pangasinan. Ang mga nahalal ay ang mga sumusunod: Ktt. Pangulo Gloria Dava Labarda, Ktt. Kalihim Estrella V. Nicdao, Ktt Ingat-Yaman Josefina C. Panlilio, Punong Kagawaran ng Pananampalataya Obispa Romana D. Javen, at Imbestigador Heneral  Francisco Samson.

Tanging ang magulang na Francisco Samson ang nagkaroon ng katunggali para sa pagiging Imbestigador Heneral. Ang mga naihalal ay sila ring mga naunang  incorporators, bahagi ng Interim Officials ng Kapatiran Ang Likas na Kaliwanagan (K.A.L.K.). Ito ay nagpapatunay lamang na gusto at sang-ayon ang mga kapatid sa K.A.L.K. sa kanilang pamumuno. “To be a great leader you must have the competence and the right character.” Kahit gaano katalino ang isang namumuno kung wala naman itong pagpapahalaga sa kanyang mga miyembro at puro mga pansariling interest o kapakanan lamang ang kanyang iniisip ay hindi iyon matatawag na totoong lider.

Tahimik at maayos na ginanap ang halalan sapagkat masayang nakilahok ang mga kapatid. Malaya silang pumili ng mga gusto nilang iboto bilang mamumuno na inaasahang magsisilbing mga gabay para sa pag-unlad ng K.A.L.K. Ngunit hindi ibig sabihin nito na sila lang ang may katungkulan o responsibilidad sa K.A.L.K., kundi tayong lahat na magkakapatid ay may kanya-kanyang tungkulin na dapat gampanan sa ating Kapatiran. Ayon ng sa isang kasabihan “If there is unity there is success.” –ulat nina Ann Gabriel at Ida Panlilio

—– 😀 —–

Ito ang damdamin ni Gat. Dr. Jose Rizal para sa kanyang lupang tinubuan na kanyang pinatunayan at naging mitsa ng kanyang maagang pagpanaw. Tinagurian siyang Pride of the Malay Race sapagkat isa siyang katangi-tanging Pilipino, bihasa sa 24 na wika, manggagamot, eskultor, pintor, manunulat, tunay na genius at higit sa lahat ay isang “man of peace”.

Kung may George Washington ang Amerika, Simon Bolivar ang Venezuela, Garibaldi ang Italya at Joanna de Arko ang Pransya, tayo ay may Jose Rizal, ang nagdala ng karangalan sa ating bansa nang maglakbay siya sa iba’t ibang panig ng mundo – sa Asya, Europa, Amerika at nagkaroon ng maraming kaibigan at tagahanga. Bagaman nakaririwasa sa buhay, pinili siya ang magtiis ng kahirapan upang malimbag ang sinulat niyang NOLI at Fili, na nagmulat sa mga Pilipino sa pang-aapi ng mga Kastila gaya nina Bonifacio, Luna, del Pilar, Jacinto at iba.

Sa panahong ito, sino ang matatawag nating bayani na katulad ni Gat. Dr. Rizal na ang panulat ay nagdulot ng pangamba sa isang bansang makapangyarihan? Na pinili ang kamatayan kaysa yumuko sa mapang-aping dayuhan.

Marahil, minsan lang sa isang buhay… only once in a lifetime…

Tunay na karapat-dapat siyang kilalanin, dakilain at igalang, kaya’t ang K.A.L.K. ay buong pagmamalaking nagpupugay sa kanyang ika-144 na kaarawan…

Maligayang PASKO NG Pilipino!

GLORIA D. LABARDA

Kataastaasang Pangulo

—– 😀 —–

Magpasalamat lagi sa Ktt. Ama sa Kanyang mga ipinagkakaloob sa atin upang maging karapat-dapat tayo sa pagtanggap ng darating pang biyaya. Iyan ang palaging pahayag ng ating Patnugot ng K.A.L.K. Ang mga taong tanggap lamang ng tanggap ngunit hindi marunong magpasalamat ay magugulat na lamang isang araw na wala na silang tinatanggap na biyaya.

Ayon nga sa kasabihan: “Ang pasasalamat ay alaala ng ating puso.”

Sinabi ng isang paham sa isang kaibigan: “Kapag nakikita ko ang isang kapus-palad na tuwang-tuwa na tumatanggap kahit ano at hindi maalaman kung paano ang gagawing pagpapasalamat ay napapahiya ako. Kayrami kong dapat ipagpasalamat sa Diyos.”

Kung kaya nga napakahalaga na sa pagmulat pa lamang ng mga mata sa umaga, kung hindi ka makapagpasalamat sa mga tinanggap mong biyaya ay pasalamatan mo naman ang mga naligtasan mong kahirapan at kasawian.

Narito ang isang magandang tula sa wikang ingles na hindi nagpakilala ang sumulat. Iisa ang mensahe nito, pasalamatan ang bigay ng Poong Maykapal.

Today, upon the bus I saw a lovely girl with golden hair,
I envied her, she seemed so gay, and I wished I were so fair,
When suddenly she rose to leave, and I saw her hobble down the aisle,
She had one leg, and wore a crutch, and as she passed, a smile.

Oh God, forgive me when I whine…
I have two legs. The world is mine.

And then I stopped to buy some sweets, The lad who sold them had such charm,
I talk to him: he seemed so glad… if I were late ‘twould do no harm,
And as I left he said to me :”Thank you. You have been so kind.
It’s nice to talk to folks like you. You see,” he said, “I’m blind”.

Oh God, forgive me when I whine…
I have two eyes. The world is mine.

Later, walking down the street, I saw a child with eyes of blue.
He stood and watched the others play; it seemed he knew not what to do.
I stopped a moment, then I said, “Why don’t you join the others, dear?”
He looked ahead without a word, and then I knew he could not hear.

Oh God, forgive me when I whine…
I have two ears. The world is mine.

With legs to take me where I’d go,
With eyes to see the sunset glow,
Two ears to hear what I would know…

Oh God, forgive me when I whine…
I’m blessed indeed. The world is mine.

Ang makatang nagkukuwento sa tula ay reklamo ng reklamo. Hindi niya pinasasalamatan ang biyaya ng Diyos sa kanya hanggang Makita niya ang mga bata na may kapansanan.

Anuman ang ipinagkaloob ng Diyos sa atin ay lagi nating pasalamatan upang hindi mawala o bawiin sa atin. Kapag marunong tayong lumingon ay dadating ang mga biyaya sa ating buhay.

Sinasabi na ang mga taong nagpapasalamat ay masaya, marunong magbahagi sa mga wala at sinisikap niyang maging mabuting anak ng Diyos. Siya ang karapatdapat pagkalooban ng pagtingin ng Diyos.  (Ang kuwento ay halaw sa Tempo, Lakbay Diwa ni Bella Abangan)

—– 😀 —–

Sa pamumuno ng mga magulang na Esther Villanueva (Facilitator) at mga kabataang nagseminar sa Templo Rizal Sgy. Pag-asa Mt Banahaw, Ilayang Dapdap, Tayabas Quezon, ay ninais nila, (kasama po ang inyong lingkod) na ibahagi sa mga kabataang hindi nakadalo ang aming mga natutuhan. Naitakda ang echo seminar noong Abril 30, May 1, 7, 8, 20, at 22, sa mga Templo ng Linao Dalayap, Calingcuan, Villa Bacolor at Mayang Tarlac City, na itinapat sa araw ng Sabado at Linggo, kung saan gaganapin ang Misa. Masaya pong ibinabalita na hindi inaasahan ang ganoong karaming participants ang nag-attend ng seminar dahil sa gusto rin nilang magkaroon o madagdagan pa ang kanilang kaalaman tungkol sa ating kapisanan.

Dahil dito, hindi lang nadagdagan ang kanilang kaalaman kundi lubusan pa silang nagkakilala at nagkaroon ng magandang samahan ang mga kabataang K.A.L.K. Para lalong mapagtibay an gaming nasimulan, sa seminar ding ito binuo ang pansamantalang pamunuan ng Kabataang K.A.L.K. ng Tarlac.

Ang mga Temporary Officials ay sina: President: Ninoy Pangilinan, Vice President: Michael Hilario, Secretary: Tutchie Panlilio, Treasurer: Ann Ann C. Gabriel, Asst. Treasurer: Irene Torres, Auditor: Alvin Nicdao, Asst. Auditor: Charlie Antonio, PRO: Fermin Rigor, Asst. PRO: Rolando Pangilinan Jr., Bus Manager: Benjie Rigor, Asst. Bus Manager: Ricky Antonio, Sgt.at Arms: Richard Pangilinan, Asst. Sgt. at Arms: Dante Pangilinan.

Napagkasunduan kaagad ang pagkakaroon ng unang proyekto: Ang pagkakaroon  ng basurahan ng bawat Templo, na agad-agad ay naisakatuparan.

May 22 natapos ang seminar na halos na ayaw naming magkahiwa-hiwalay ang mga kabataan. Kitang-kita sa mukha ng lahat ang kasiyahan sa ginawang  pagbubuo sa mga kabataan. Sana po ay maging tuloy-tuloy-tuloy na an gaming nasimulan, upang maging karapatdapat sa taguring mga “Kabataang Pag-asa ng Bayan.” –ulat ni Tutc Panlilio, Tarlac City.

Noong inimbitahan ako ni kuya emon (Raymond Javen) na pupunta daw kami sa Templo sa bundok at doon nga magseseminar, naisip ko: “ano kaya ang gagawin dun? Hindi kaya mabored lang ako dun at sino-sino pa kaya ang a-attend?”

Umalis kami ng umaga ng Aril 10, siguro 8am nay un pero hindi si kuya Emon ang kasabay ko kundi si ate Resel. Kakapagod ang pag-akyat, tulo na nga ang pawis ko pero sulit naman dahil sa pagpasok pa lang, makikita na ang wishing falls sa bagong ayos na Rizal Park. “Wow! Ang ganda, nakakawala ng pagod!”

Kinabukasan nagsimula na ang seminar. Madami ang umattend, taga iba-ibang lugar. Kami lang ng pinsan ko ang taga_quezon. Nakakailang dahil hindi namin maintindihan ang salita nila, pero ng sinabi ng facilitator ng seminar na sikaping Tagalog lamang ang mga pag-uusap ay natuwa kami.

Nag-start ang seminar sa pagpapakilala pagkatapos ay nagkaroon ng group activity na ang purpose ay mawala ang pagiging mahiyain namin sa isa’t isa. Nag-grouping at nagbotohan kung sino ang gagawing lider ng bawat grupo. Hindi inaasahan na nakasama ako sa naging lider.

Pinaliwanag ang ibig sabihin ng K.A.L.K. at ang kasaysayan nito. Itinuro ang mga aral ng kapatiran, ang paggalang sa opinion ng iba, ang malayang pagpapasya na nakapaloob sa Doktrina at Banal na Simulain ng K.A.L.K. at layunin nito at marami pang iba.

Sa paglipas ng mga araw na magkakasama kami ng mga kabataang buhat sa iba-ibang lalawigan, unti-unti ng nagkapalagayan ng loob ang isa’t isa. Pagkatapos nag-hiking pa kami, pumunta nga kami sa tangke para doon maidiscuss ang pagkakaiba ng Spiritual at Material. Siguradong ikatutuwa mo rin kung naging bahagi ka ng discussion na ito.

Sa gabi, mas maraming bonding activities, kantahan, kuwentuhan na talagang hindi ka dadalawin ng antok dahil sa saya ng pinag-uusapan at mga group activities na ginawa namin.

Sa umaga pagkatapos ng pagpupuri sa Amang Araw ay mag-eehersisyo, maglilimnis kami ng paligid bago kumain. Pagkatapos maglinis ng katawan ay simula na ulit ng pag-aaral. Sa pag-aaral naman ay hindi ka mabo-bored dahil bahagi ng pag-aaral ang mga group activities upang lalo naming maintindihan ang mga pinag-aaral bukod pa sa lalong mapalapit sa bawat isa, magtiwala, gumalang at kumilos na parang isa.

Napakarami pa naming ginawa, pero secret na para ma-preserve ang excitement sa pag-attend ninyo ng seminar para sa Kabataang K.A.L.K.

Ang masasabi ko lang, ang mga katanungan ko noong bago palang ako pumunta sa Templo sa Bundok ay nabigyan ng mga kasagutan. Mas higit pa sa aking inaasahan. Hindi lang puro happenings, kundi natutunan naming ang halaga ng isang samahan, paggalang sa kapwa, ang malayang pagpapasya at higit sa lahat ang matinding paniniwala sa Diyos dahil sabihin mo mang ikaw ang pinakamalas, malungkot, nag-iisa, hindi mo man alam kung saan ka tutungo, tumawag ka lang sa Kanya at hindi ka Niya pababayaan.

Basta, kung gusto mong makilala ang sarili mo at hindi ka maligaw ng landas, subukan mong umattend sa suunod na seminar at talagang maliliwanagan ka. –Joeven delos Santos, Tayabas Quezon

Muling binuhay ng magulang Oscar Labarda ang tatlong letrang K na hango sa samahang itinatag ng mga Dakilang Katipuneros ng lahing Pilipino. Sa pamamagitan ng tatlong letrang K na binigyan ng bagong kahulugan, malinaw na naihayag ang mga mithiin ng  mga kapatid sa Kapatiran Ang Likas na Kaliwanagan, K.A.L.K.

Ibinabahagi ang mga kaayusang sinisimulan at ginagampanan sa ilalim ng pamamahal ng mga Pamunuan ng K.A.L.K. Unang-una ay ang pagsunod sa itinakda ng Saligang Batas ng Kapatiran, (ang pagkakaroon ng Halalan) pagkakampanya sa maayos na mga tala ng kapatiran (bookkeeping, atbp), pagkakaroon ng maayos na babasahin para sa mga kapatid, pagsasanay ng mga Obispa at Apostolada sa mga gawaing pang-espiritual, ang pagsusumikap na magkaroon ng maayos na Bahay Dalangina, pagkakaroon ng bukas na pakikipagtalastasan sa mga kapatid sa kapatiran, upang kagyat na malunasan kung magkaroon ng hindi pagkakaunawaan, ang pagkakaroon ng transparency sa mga gawain ng Pamunuan  at marami pang iba.

Sa loob lamang ng isang taon buhat ng maliwanagan ang mga kapatid sa K.A.L.K. ay nadama na ng mga kapatid ang unti-unti kaunlaran ng Kapatiran.

—– 😀 —–

 

Panawagan

Sa seminar ng mga kabataan noong nakaraang Abril 10-14, ipinamahagi ang babasahing: Para sa kababaihan ng K.A.L.K. Mga tinipong aral para sa kababaihan, tungkulin sa kapisanan, bayan at tahanan, at mga awit na sinulat lahat ng dating Pangulo Salud Nuevo.

Muling ipinaalaala ang Kautusan sa mga Kababaihan ng K.A.L.K. at panawagan sa lahat ng mga Apostolada at Obispa.

1. Sa pagpapakilala sa ating panunuparan sa Kataastaasang Ama ay mag-aalay ng nobena para sa ating amang Dr. Rizal bago sumapit ang ika-30 ng Disyembre : Kataastaasang Ama, Maningning na Tala at Sariling Debosyon kung oras na tahimik.
2. Ang nobena ay paglilinis din ng budhi at kaisipan sa mataimtim na panalangin at pagpupuri sa Ama.
3. Huwag magsasalita ng masama pati sa mga anak na nagkakamali.
4. Intindihing mabuti ang mahalagang tungkulin at mga gawain, mga pangaral, kautusan at disiplina.
5. Lakipan ng ibayong kasipagan, maging masinop at mapagmalasakit sa kabuhayang kaloob ng Diyos.
6. Maging malinis sa mga anak, sa pamamahay at paligid kahit saan mapatigil at manirahan.
7. Paka-ayusin ang buhok at maging malinis sa pananamit sa araw-araw upang igalang ng sinumang tumitingin.
8. Maging huwaran sa kapwa kababaihan na walang inaaksayang sandal upang magampanan ang mararangal na Gawain.
9. Ang mga Obispa, Apostolada at Asistentes ay dapat na dumalo sa lahat ng pagtitipon sa abot ng makakayanan. Patuloy ang pananalangin sa umaga, hapon at pagtupad sa loob ng Templo Rizal.
10. Hubugin ang mga anak sa pananalangin tuwing hapon sa loob ng Templo at tamang disiplina.
11. Intindihin at makibalita sa mga pangyayaring nagaganap sa loob ng kapatiran tulad ng mga sirkular, kautusan, mga pinagtibay na resolution at disiplinang ipinatutupad.
12. Magkaroon ng makabuluhang partisipasyon sa pamamahala, upang magkaroon ng pagmamahalan, pagdadamayan upang magkaroon ng kaayusan at katiwasayan.
13. Magturo ng mabubuting asal, paggalang sa matatanda at mga bagay na mapanatili ang ating matandang kaugalian at kultura bilang Pilipino.
14. Pakaingatan ang bawat karangalan at piliting mabuhay sa marangal na paraan.
15. Magbigkis-bigkis at magdamayan sa gitna ng ‘di inaasahang mga kalamidad.
16. Maging matalas ang pakiramdam sa pakikipagtalastasan sa kapwa upang hindi Masaya at malinlang.

“Subaybayan nawa tayo ng Kataastaasang Ama, Itangkakal nawa tayo ng Kamahal-mahalang Ina, Pamamagitan nawa tayo ng mga anak na siyang mga martir at bayaning banal, at patnubayan nawa tayo ng Espiritu, na siyang anghel na nagtatanod sa araw at gabi, upang mapanuto tayong lahat, sa katiwasayan at kapayapaang walang hanggan.”

Tagatalima sa mga kautusan ng K.A.L.K.

SALUD F. NUEVO

Sipi 1 Isyu 4 Hunyo 2005

—– 😀 —–

Sipi 1 Isyu 3 Abril 2005

Larawan ng mga magkakapatid sa K.A.L.K. pagkatapos ng paghahandog ng bulaklak at panalangin sa bantayog ni Dr. Jose Rizal

Disyembre 30, 2004- Bago magbukang liwayway ay maayos na nakapila na ang mga magkakapatid ng Bagong K.A.L.K. sa tabi ng bantayog ng ating Pambansang Bayani Gat. Dr. Jose Rizal. Mapayapang naisaayos ng mga boyscout ng kapatiran na makisig na nakasuot ng kanilang bagong uniform ang formation ng mga magkakapatid.

Nagmula sa Makati ang mga kapatid na maghahandog ng bulaklak. Hapon ng Disyembre 29, ay naipon na sa Templo Rizal Sgy. Kalayaan Blg. 2 sa Makati ang mga kinatawan buhat sa sangay sa iba-ibang lalawigan. Isang makabuluhang pagtitipon. Nagampanan ang lahat ng paukol na papuri na kinamulatang gawain ng mga magkakapatid. Sa pagpasok ng ika-12 ng umaga, pagbabalik tanaw sa buhay ng dakilang bayani, pagbasa ng kanyang mga aral at huling pahimakas na mataimtim na naisagawa matapos ang Misa. Halos wala ng tulog, naghanda naman para maging bahagi ng buong bayan sa paggunita sa kabayanihan ng Pambansang Bayani.

Sa pagdating ng mga organizer ng pamahalaan sa ika-109 taong kabayanihan ni Dr. Jose Rizal ay kaagad-agad nagpalista ang ating kapatiran sa mga hanay ng mga samahan ng mag-aalay ng bulaklak sa araw ng pagkabaril kay Dr. Jose Rizal.

Matapos ang mga taunang ginaganap ng pamahalaan sa pagdakila sa kabayanihan ni Gat. Dr. Jose Rizal, ilang saglit lamang ay tinawag na ang Kapatiran Ang Likas na Kaliwanagan (K.A.L.K.) upang maghandog ng bulaklak.

Sa pangunguna ng Ktt. Pangulo Gloria D. Labarda, mapayapang tinungo ng magkakapatid ang harapan ng bantayog ni Dr. Jose Rizal at mataimtim na naihandog ang bulaklak at panalangin ng kapatiran.

Bago maghiwa-hiwalay ay magkakasamang pumasyal ang magkakapatid sa Rizal Shrine. Nagkaroon ng maikling pagtanaw sa katatapos na ginawang paghahandog. Humingi ng mga panukala upang lalong mapatingkad ang mga susunod pang pakikibahagi ng Kapatiran Ang Likas na Kaliwanagan (K.A.L.K.) sa taunang paggunita sa kabayanihan ni Gat. Dr. Jose Rizal.

———————————————————————————————————————————————————–

Nagsimula ang lahat ng ating matitibay na Paniniwala, matatamis na pagmamahalan, sama-samang pananalangin, pagsusunuran at ‘di malilimutang mga lumipas na sandal ng maramdaming pagsasamahan, sa araw ng ating ginugunita ngayon, ika 14 ng Abril, araw ng pagkatatag ng Pananampalataya ng Kapatirang Ang Litaw na Katalinuhan.

Ang ating tagapagtatag, Kgg. Apong Angel Lorenzo ay hindi kailanman nagkamali sa kanyang mga pinangarap na DAKILANG ADHIKAIN, ang maisiwalat Ang Lihim ng Banal na Simulain sa lahat ng mga kapatid na naniwala sa kanyang mahiwagang karunungan.

Ang mahabang panahong ating iniukol sa pagtataguyod ng kanyang mga pangarap, puno ng pagtitiis, pagpapakasakit, at pagmamalasakit, pinag-aksayahan ng panahon, pawis at salapi, pagsisikap na makapagtayo ng mga Templo bahay-dalanginan, kung saan idadaos ang ating matataimtim na pananalangin at pagpupuri sa Ktt. Ama, ay humantong lamang sa isang hindi inaasahang pangyayari…

Sa araw na ito, matatag ang ating mga kalooban at walang takot na ating ititindig ang gumuhong pangarap, sumusumpa at muling nangangakong pag-iibayuhin ang pagtataguyod sa Banal na Simulain ni Apong Angel, sa ilalim ng ating Bagong K.A.L.K., ang Pananampalataya ng KAPATIRAN ANG LIKAS na KALIWANAGAN.

Maligaya ang bawa’t sandal sapagkat pawing malilinis ang ating mga budhi. Taos-puso ang pasasalamat sa Amang Maykapal sa magandang kapalarang itinakda Niya para sa atin, na magkasama-samang muli sa panibagong kabanata na ating hinaharap.

Ang kaibahan nga lamang, sa pagkakataong ito, an gating pagkakapatiran ay batay sa probisyong ipinatutupad ng ating Saligang Batas, sa masugid na pagsunod sa Dakilang Alituntunin ng Pananampalataya: may PAGPAPAKUMBABA at PAGPAPATAWARAN; may PAGTUTULUNGAN at PAGDADAMAYAN; may PAGTITINGINAN; may MABUTING PAGSUSUNURAN at PAGSASAMAHAN; ng marating natin ang tunay na diwa ng PAG-IISANG DAMDAMIN SA SAMA-SAMANG PANANALANGIN.

Ang mga katangiang nabanggit ang buod ng mga pangarap para sa atin ng ating tagapagtatag at ng lahat ng ating mga magulang na masugid na sumunod sa Kanyang mga Utos at Aral.

Sa araw ding ito pagtitibayin ang ating pagiging huwaran sa mga kabataang nagsisipag-aral na inaasahang mga susunod na haliging guguhit ng ating Pananampalataya.

Patnubayan nawa tayong lahat ng Ktt. Ama.

G. D. LABARDA

Ktt. Pangulo

————————————————————————————————————————————————————

BAGONG KASUOTAN ng Boyscout ng BAGONG K.A.L.K.

Unang isinuot ang bagong uniform ng mga boyscouts ng bagong K.A.L.K. noong Nobyembre 29, 2004. Bisperas ng pagdiriwang sa kaarawan ni Gat. Andres Bonifacio. At sa paggunita ng kamatayan ng pambansang bayani Gat. Dr. Jose Rizal ay karagdagang tingkad ng pagtitipon ang pagsusuot ng kanilang bagong uniform. Ang mga masisigasig na boyscouts o Lupong Unang Payapa ng kapatiran, puno ng kagawarang ito ay si kapatid Roberto “Obet” Supan ng Bora Tarlac. Sa kagandahang loob ng magulang Oscar Labarda ay nagkaroon ng tela para sa uniform ang unang labindalawa (12) na nagnanais na maging boyscout ng kapatiran.

Hindi lamang basta pagbibigay ng kasuotan ang isinagawa sa kapatiran. Tinipon din ang lahat na nagnanais na maging boyscout na kapatiran. Nagkaroon ng isang pulong at ipinaliwanag sa kanilang lahat ang tungkuling kaakibat ng pagsusuot ng bagong kasuotang ito.

———————————————————————————————————————————————————–

Kaliwanagan sa araw ng kagitingan

BATAAN – Kasabay ng pagdiriwang ng Araw ng Kagitingan sa Templo Rizal Sgy. Kagitingan ay ipinagdiwang din ang pagkakatayo ng bagong Bahay Dalanginan. Kinonsangra ni Obispa Romana D. Javen ang katatapos na Templo Rizal. Itinaguyod ng pamilya Magcalas sa pangunguna ng magulang Loleng Magcalas ang pagtatayo ng Templo Rizal na nabanggit. Ang Templo Rizal na ito ay isa sa malaking bahay dalanginan ng mga kapatid sa K.A.L.K.

Enero 2 taong kasalukuyan ng dalawin ng pamunuan ng Kapatiran Ang Likas na Kaliwanagan ang Sangay sa Bataan. Matapos ang pagpapaliwanagan ay ipinag-anyaya ng magulang at mga kapatid sa kanilang sangay sa pamumuno ni Nanay Loleng Magcalas ang muling pagbalik doon ng Bagong K.A.L.K. sa araw  ng kagitingan. Napagkasunduan ang papakunsagra ng bagong tayong bahay dalanginan sa ilalim ng bagong pagkilos ng kapatiran.

Bago matapos ang buwan ng Enero ay tinapos din ang pagguhit ng Kataastaasang Ama sa pagtutulungan ng magulang Ador Dava at kapatid Raymond Javen.

Isa na namang pagtupad na tagubilin ng Kataastaasang Supremo Angel Lorenzo ang pagsusumikap na maitayo ang Templo Rizal na ito. At ayon nga sa magulang Loleng Magcalas, lumipas man ang mga taon na siya ay wala na sa mundong ibabaw, isang pamana naman ang kaniyang maiiwan na magiging kanlungan ng mga magkakapatid sa K.A.L.K. sa habang panahon.

Di Ba’t ito ang nais natin?

ni Sergio Rigor Batang Batang Tarlac City

Sa masalimuot  na landas na ating tinatahak, sulyapan natin ang mga Martir, pakinggan nating muli ang kanilang wika, kaakibat ang Litaw na Katalinuhan upang maarok natin ang Likas na Kaliwanagan.

Ang ating mga karanasan ay nagpapatunay na, tayo bilang tao, ay higit pa sa tao, dahil tayo ay may bukas na puso at kaisipan sa mga dimension ng Kataastaasang Ama ng Lupa at Kalangitan.

Ang tunggalian at pingkian ng katuwiran ay likas lamang sa isang tagpuan. Kung gagawin natin ito sa pamamagitan ng malusog na kaparaanan upang maisabuhay natin ang isang Banal na Simulain, ito ay kabutihan. Ito ang diwa ng pag-ibig na malaya nating maipahahayag sa bawat isa.

Damhin at limiin ang bawat pintig ng ating mga puso, bumubulong ng pagkakaunawaan. Inaawit ang himig ng kapisanan. Saan man natin ibaling ang ating paningin nandoon pa rin at nakaukit ang mga magagandang larawan ng ating pagsasamahan. Kumakaway ang bawat mga kamay, may matatamis na ngiti sa bawat labi, taas noong nagpupugay sa Haring Araw, inuusal ang “Dios ay sumaatin, Pagpalain tayo.”

Ang dupikal ng kampana at kuliling ay mga hudyat ng kaligayahan, ng pagdiriwang, ng karangyaan sa pagsasamahan, sa kabila ng kahirapan. Ang mga awiting maka-Diyos at makabayan ay himig na magiging daluyan ng ating pagpapakilala at pagpapaliwanag ng tungkol sa kapisanan. Pinagdamutan natin sa hapag-kainan ang biyaya-tulong galling sa mga kapatid ng Kapatiran.

Paano natin ito malilimutan? Bakit ito tatalikdan?

Isinuko natin sa Kataastaasang Ama ang ating mga karupukan, ipinamahala natin sa Kanya ang ating kaligtasan sa lahat ng panganib na nag-umang sa atin..

“Ampunin Mo po ang aming katipunan,

kupkupin Mo po ang aming mga kapatid,

sapagka’t kami ay pawa Mong mga anak..”

‘Di ba’t ito ang ating nais, na nakapaloob sa ating panalangin?

Maaaring sa ngayon, ang ating material na kabuuan ay nagkakalayo, iisa pa rin ang itinitibok ng ating mga budhi. Iniisip at kailangan pa rin natin ang bawat isa sa atin, dahil iisa naman ang ating layunin.

“Magpatawaran sa isa’t isa, sa magandang loob at wala sanang pagtataniman sa kapwa.” Di ba’t ito ang nais natin?

——————————————————————————————

PITUMPU’T ISANG TAONG PAGKAKAPATIRAN

Templo Rizal, Mt. Banahaw, Ilayang Dapdap, Tayabas Quezon –Pitumpu’t isang taong pagkakapatiran – isang makabuluhang pag-uugnayan!

Ang pagpasok sa ika-8 dekada ng kapatiran ay sinimulan sa muling pag-aaral at pagsasanay kung paano maisasagawa ang mga kabutihang dala ng pagkakapatiran. Nakapaloob sa 6 na araw na pag-aaral ang pagbabalik tanaw sa kasaysayan ng K.A.L.K. at kasaysayan ng Ktt. Supremo Apong Angel Lorenzo.

Ang mga Banal na Utos at Aral at Saligang Batas ng kapatiran ay isang tungkulin din ng mga kapatid na basahin at sundin kung kaya ito ay matiyagang ibabahagi. Panuntunan ng mga kababaihan at kalalakihan ay kasama sa mga paksang tatalakayin.

Ang Doktrina ng Banal na Simulain ng K.A.L.K. ay ang magiging sentro ng pag-aaral.

Ang limang epektibong gawi ng isang lider ay nakapaloob din na pag-aaralan sa seminar na ito. Ilan sa bibigyang diin ng pagbabahagi ng kaalaman ay ang pagkakaiba ng “effective and ineffective behavior of a leader”.

Ang pagkapaloob ng leadership training ay isang magandang pagkakataon upang masanay ang mga kabataan sa tamang panuntunan ng pagiging puno ng kapatiran. Ito ay isa pa ring magandang pagsasanay upang ang mga kabataan ay epektibong makapagbahagi ng kanilang matututunan sa seminar sa mga kapatid sa kanilang sangay na hindi makakadalo sa pag-aaral.

Isang kakaiba at bagong seminar ang naghihintay sa mga kapatid na dadalo. Kinapalooban ng mga pamamaraan upang hindi maging boring ang gagawing pagtatalakayan.

Ang pag-aaral na ito ay simula ng walang patid na pag-aaral ukol sa mga aral na iminulat sa lahat na mga kapatid sa K.A.L.K. Ang patuloy na pagpapaala-ala ng mga kabutihang hatid ng pagkakapatiran ay daan upang hindi na kailan man mawaglit sa puso ng magkakapatid ang mga kabutihang ito…

Ito ay paraan upang manatiling nagniningas ang mga ilaw ng bawat kapatid, at nang sa ganun ay patuloy na makapagbigay ng kaliwanagan.

Kapatiran at Kaliwanagan sa pagpasok ng ika-8 siglo ng K.A.L.K.

Maligayang Anibersaryo! 😀

Katulad ng maraming namamasukan, tanggap lang ako ng tanggap ng obertaym. Walang araw na hindi ako nagtatrabaho. Inaabot ako ng alas-diyes ng gabi mula Lunes haggang Biyernes. Hindi na ako nakakadalo sa pagdarasal tuwing alasais ng hapon. Tuwing Sabado, maghapon pa rin akong kayod ng kayod. Kaya hapong-hapo na ang katawan ko paglabas ng opisina. Pagdating ng linggo hindi na ako makapagsimba.

Sa kabila ng dagdag na kita ko, kapos pa rin at napipilitan pang mangutang upang ipanustos sa pangangailangan sa bahay at pag-aaral ng mga anak ko.

Ngayo’y wala na akong hanapbuhay. Nabigo ako sa itinatag kong negosyo at umaasa na lamang sa maliit na buwanang pension. Meron pa ring suliraning pinansyal, ngunit regular na akong nakasisimba sa tuwing sasapit ang mga takdang araw ng Misa. Regular  na rin akong nakakapagdasal tuwing alasais ng hapon. Ang katawang pata ay nakakatikim na ng pahinga, may panahon pang magsimba at magdasal.

Sa aking pakiramdam, sa takdang araw ng mga pagmimisa ay nasa bahay na ako ng aking Ama at sa Kanya ko naidudulog ang aking mga pangangailangan na hindi nagawang punuan ng araw-araw na obertaym. (Ang kuwentong  ito ay halaw sa Pahayagang Tempo Lakbay Diwa ni Bella Abangan)

Isipin natin: “ano man ang tiyaga at sipag mo, kung ang Diyos ay walang basbas, dusa’t pighati rin ang magiging wakas”.

Halika na at makipag-ugnay.

Sipi 1 Isyu3 Abril 2005

(Most of the graphic designs in this page were done by Artisfaction)

(Pictures taken by Ms. Gina H. Dollesin)

Back to Top

Sipi 1 Isyu 2 Disyembre 2004

MALINAW SA LINAO

“…..walang matatagpuang halimbawa sa kasaysayan

na napaurong ang isang nasa landas ng kaliwanagan ….”

-Gat. Dr. Jose P Rizal

Naging malinaw ang pagsang-ayon ng mga  kapatid sa Bagong K.A.L..K. sa pakikibahagi nila sa pagdiriwang ng Bonifacio Day sa Templo Rizal Sgy. Inang Pilipina Blg. 35, Sitio Linao Dalayap Tarlac City.

Mahigit sa dalawang daang mga kapatid ang nakiisa doon. Sa kabila ng malakas na buhos ng ulan ay hindi napigil ang mga kabataang K.A.L.K. na maipalabas ang kanilang mga inihandang pampasiglang bilang na lalong nagpatingkad sa paggunita sa ika-141 na kaarawan ng magiting na bayani Gat. Andres Bonifacio.

Sa pagtitipon na ito nanumpa ang mga karagdagang pamunuan na uugit ng Kapatiran Ang Likas na Kaliwanagan hanggang maitakda ang halalan sa darating na Hunyo 19, 2005. Ang karagdagang bahagi ng interim government ng Bagong K.A.L.K. ay ang mga sumusunod:

•  Sangguniang Tagapayo: Crisanto Pangilinan, Luis Villafuerte, Francisco Taruc, Manuel Franco, Nestor Bicomong, Jose Dava Sr., Luisa Tabernilla, Lourdes Tadaya, Tiburcia Cordero. Benita Lansangan.
• Pang. Ktt. Pangulo: Romana D. Javen
• Pang. Ktt. Kalihim: Imelda P. Mateo
• Pang. Ktt. Ingat-Yaman: Recy T. Diapera
• Pang. Puno ng Kagawaran ng Pananampalataya: Juliet V. Tabernilla
• Puno-Lupong Unang Payapa: Roberto Supan
• Puno-Lupon ng Kabataang K.A.L.K. : Lito Garcia
• Punong Obispa ng Sur: Victoria T. Cabesuelas
• Punong Obispa ng Norte: Ofelia L. Basangan
• Tagasaliksik: Ador N. Dava
• Pangalawang Tagasaliksik: Emilio Rigor
• Puno-Panguluhan ng Norte: Francisco Palo
• Assistant ng Pangulo  Rodrigo Marcelo (Security Staff):
• Tagasuri (Auditor): Mario Pangilinan
• Pangalawang Tagasuri: Romeo Basangan
• Tagausig ng Norte (Fiscal): Manuel Franco
• Imbestigador ng Norte: Emeterio Tubilan
• Imbestigador ng Sur: Dionisio Tabernilla

Ipinaliwanag ng Ktt. Pangulo  ang kanilang tungkulin sa pamamagitan ng pakikipag-usap sa bawat isa. Malinaw din na nakasulat sa likuran ng nobramiento ng ilan ang  katungkulan na may mas malawak na gagampanan.

Naging madamdamin ang paggagawad ng Ktt. Pangulo ng nobramiento ng tungkulin na Tagasaliksik sa kanyang kapatid Ador Dava. Maging ang mga kapatid na nakasaksi ay hindi rin mapigil na mapaluha. Marahil ay bumalik ang alaala ng kanilang mga magulang (dating pangulo Salud Nuevo at dating Ktt. Kalihim Severo Dava) na pangunahing tagapagtaguyod ng K.A.L.K. at ngayon naman, bilang paggalang sa pagod na pinuhunan ng kanilang mga magulang ay magkakasama naman sila bilang tunay na magkapatid sa pagtataguyod ng K.A.L.K.upang hindi masayang ang pinagpaguran ng kanilang mga magulang.

Ang pagtatalaga ng mga pamunuan ay bahagi ng marami pang hakbang  na patuloy na magtataguyod na sinimulan ng mga magulang Apong Angel Lorenzo at dating pangulo Salud Nuevo. Ang mga nanumpang mga kapatid ay bahagi ngayon sa pagpapatuloy ng kabutihang ipinamana sa K.A.L.K.. Lakip ang panalangin, sama-samang babalikatin ng mga nagmamalasakit ng mga kapatid para maipamana rin ang kabutihang ito ng pagkakapatiran sa mga kabataan ng K.A.L.K. Sa pagtutulungan ito ng mga naliliwanagang mga kapatid ay nakikita na ang malinaw na hinaharap ng Bagong K.A.L.K.

Sa ating paggunita sa kadakilaan ni Gat. Dr. Jose Rizal     ngayong ika-30 ng Disyembre taong 2004,hindi lamang ang kanyang kabayanihan kundi bigyan natin ng pahalaga ang kanyang mga aral.  Ang mababangong bulaklak na ating inialay ay simbolo ng matamis na pagmamahal at pasalamat sa kanyang iniwang huwaran ng pag-ibig sa Inang Bayan.

 Maigsi lamang ang panahon na ipinagkaloob sa atin ng Amang Maykapal upang manatili sa ibabaw ng lupa. Kaya huwag nating sayangin ito sa bagay na walang kabuluhan.  Isipin natin ang kapakanan ng ating mga kabataan upang mahubog natin sila sa tamang gawain na kapaki-pakinabang, alinsunod sa Dakilang Layunin ng ating pananampalataya.

 Ngunit tayo rin na mga magulang ay  magsisilbing magandang halimbawa. Ang pananatili sa ating kaisipan at damdamin ng Banal na Simulain ng K.A.L.K. ay ilaw na magbibigay liwanag anuman ang landas na ating tatahakin,. Makatarungan, matuwid at hindi nagkakamali ang bawat pagpapasiya. Sapagkat ang malinis na budhi at may paggalang sa kapwa ay may paggabay ng Banal na Espiritu.

 Sa maigsing panahon na ating iniukol upang pagtibayin natin ang pag-iisang damdamin at matagumpay nating nagampanan ang itinakdang gawain sa atin ng makapangyarihan sa lahat.

 Ang pagpapa-unlad sa ating mga Bahay Dalanginan sa Linao, Baguio, Camaysa, Paitan, Makati at sa may Bundok Banahaw ay simula lamang ng pagpapatunay sa ating pagmamahalan na siyang nais ng Ama.

 Sa pagpasok ng Bagong Taon ay sasalubungin natin ng ibayong SIGLA upang lalo nating pagtibayin ang landas na ating nasimulan. Ang lahat ng inyong ipinamalas na pagsisikap ay gagantihin din ng maunlad na kabuhayan, ligtas sa sakit, panganib at sakuna.  At katulad nga ng sinasabi sa ating awit “Bagong Taon ay dumating, Bagong Buhay dakilain. Bagong Diwa at Mithiin, Bagong Gawa at Tungkulin..”

 Sumaatin nawa ang pagpapala ng Amang Lumikha.

Manigong Bagong Taon sa inyong lahat!

 G. D. Labarda

Kataastaasang Pangulo

“..biyaya ng diwa Mong Banal, sa aming puso’y namahay…”

-Aklat Dasalan ng K.A.L.K.

“Buhat pagkabata, tinuruan na ako ng aking mga magulang ng paggalang sa kahit nong uri ng Simbahan, Templo o mga Bahay Dalanginan.

Ang dahilan?

Ang Diyos  ay   naninirahan doon.

Kung kaya, itinuturing ko ang mga Bahay Dalanginan na ito nang may malalim na paggalang.. Sinisikap ko na hindi ako makagawa ng mga bagay na makababasag ng kabanalan ng lugar.

Pero, bumagsak ako na igalang ang isang Templo ng Diyos, at iyon ay ang aking SARILI!

—Bisyo, masamang gawain, masamang pag-iisip, walang diwa ng pagkakapatiran at isang pusong sakim ang naibibigay ko sa bahay ng Diyos na ito. Napakakalat!

Pero natututo na ako, Sa paglipas ng mga araw, marami akong nakikitang kabutihan ng Diyos. Habang hawak ko ang walis na panlinis sa aking sarili, andiyan Siya kaagad sa likuran hawak ang pampunas—at sabay naming nilinis ang aking mga kalat. “

Maging inspirasyon sana ang kuwentong ito sa lahat na nais magbago para sa lalong ikakabuti ng sarili ngayong pagpasok ng Bagong Taon. (Ang kuwento ay halaw sa aklat na Lakbay Diwa ni Bella Abangan)

 MALIGAYANG BAGONG BUHAY SA LAHAT!

ISANG TINIG

“…..kami po ay lumalapit,  pinag-iisa ang tinig,

at nang mapawi ang mga hapis…..”

 -Aklat Dasalan ng K.A.L.K.

Sa pagsapit ng Bagong Taon, tuwing sasapit ang ika-6 ng hapon ng bawat araw ay halina’t ating pag-isahin ang ating tinig sa pagtawag dalangin sa Amang Makapangyarihan. Saan Templo ka man o tahanan , tayo’y sama-samang manalangin.

 

Enero      2005

 

1              Ktt. Ama (K.A.L.K.)

2              Tayong BInuhay ng Diyos

3              Hari ng Daigdigan

4              Sa Bawat Sandali

5              Ang Tunay na Hari

6              Kaarawan ni Tandang Sora, Panalangin sa Martir at  Bayani,  Ama naming Maawain

7              Panalangin sa Kaluluwa

8               O Amang Kaibig-ibig

9              Ama namin ang Bayang ito

10            Ama ng Awa at Habag

11            Kami Ama ay Lingapin

12            Ama po ay Itulot Mo

13            Sa Diyos tayo ay Umasa

14            Panalangin sa Kaluluwa

15            Maawaing Ama

16            Sa Amin Pong Pagdurusa

17            Amang Minamahal

18            Tanging Ama Namin

19            Ama ng Kahiwagaan

20            Inang Lupang Tinubuan

21            Panalangin sa Kaluluwa

22            Aba Inang Mapag-ampon

23            Amin Pong Iginagalang

24            Ang Tanang mga Angheles

25            O Angel na nagtatanod

26            Maningning na Tala

27            Ktt. Ama (K.A.L.K.)

28            Panalangin sa Kaluluwa

29            Tayong Binuhay ng Diyos

30             Hari ng Daigidigan

31            Sa Bawat Sandali

Gamitin din ng halinhinan ang apat na Pamuno: Amang Makapangyarihan, O Amang Walang Hanggan, Ama Naming Mapagpala,  Ang Kapayapaan at Pagpapala, sa pasimula ng ating pinag-isang tinig na panalangin.

DALOY NG PAGPAPAUNLAD

Linao, Dalayap Tarlac– Malugod na nasaksihan ng mga kapatid na dumalo sa pagdiriwang ng Bonifacio Day sa Templo Rizal Sgy. Inang Pilipina, Blg 35 sa Sitio Linao Dalayap Tarlac ang napakalaking improvement ng kanilang Templo doon.

Sa pagtutulungan ng mga kapatid sa pamumuno ng Pangulo ng Sangay Joaquina Pangilinan, Tagapayo Crisanto Pangilinan, Tagausig ng Norte Mario Pangilinan at Gunday Family atbp. ay napalakihan ang bintana ng Templo, inilipat din ang pinto patungo sa kuwarto ng mga Apostolada na nakatulong din sa maginhawang pagkilos sa loob ng Templo.

Nakakatuwa rin ang pagkakaroon ng bakod at pagkakalipat ng bantayog ni Gat Jose Rizal na dati na ay nakatayo sa harapan ng bahay dalanginan. Ngayon ito ay nakatayo na sa bandang kanang bahagi ng Templo na lalong nagpalaki ng lugar na pinagtitipunan ng mga kapatid. Kalugod-lugod din ang pagkakasemento ng harapan ng Templo.

Inumpisahan na rin ang konstraksyon ng kusina at CR sa gawing likuran ng Templo na bagaman at hindi pa tapos ay nagamit na rin ng mga kapatid na nagsidalo sa pagtitipong ginanap doon noong nakaraang Nobyembre 29-30. Kapansin pansin ang magandang kurtina na bagong tahi rin lamang ng pangulo ng sangay. Ang bagong latag na linoleum ay nagpatingkad din sa malaking kaunlaran ng Templo doon.

Pinasasalamatan ang lahat ng mga kapatid sa kanilang pagtulong para sa pangkapatirang kaunlaran!

 

Villa Bacolor, Tarlac:   Noong ika-28 ng Nobyembre 2004, sinimulan ang pagpapagawa ng Bagong Templo sa Villa Bacolor Tarlac, na kung saan ang mga kapatid doon ay napakaisahan na ilipat angTemplo sa Lupain ng Pamilya Tudla. Sa pangunguna ng Pangulo nila na si Liza Tudla, magulang Manuel Franco at mga kapatid ay nagkaroon sila ng contribution upang masimulan na ang pagpapagawa ng Templo.

Disyembre 12, 2004 pagkatapos idaos ng Misa sa kasalukuyang Templo ay tumuloy ang mga kapatid na galing sa iba’t ibang lugar upang tumulong ang mga kalalakihan sa pamumuno ng kapatid Artemio Tudla at iba pang mga kapatid sa paghahakot ng buhangin na gagamitin sa paggawa ng Templo. Naghanda rin ang mga kapatid ng konting salo-salo. Hindi maikakaila na kahit pagod ang mga kapatid ay nangingibabaw pa rin ang tuwa at ligaya sa kanilang mga mukha. Sa kasalukuyan ay hindi pa po natatapos ang Templo at sana po ay tuloy tuloy na ang ating magandang nasimulan.  –Tutc & An²

Batang², Victoria Tarlac:  Isang mapagpalang umaga ng Disyembre 19, 2004 ay isa na namang Templo Rizal ng K.A.L.K. ang pinagtulung-tulungan ng mga magkakapatid upang maitayo. Kaugnay ng Oplan: Tindig Templo, sa pakikipag-ugnayan ng kapatid Lito Garcia ay sinimulan ang proyektong mabubungan ang lugar na pinagdadausan ng Misa sa Batang-Batang Victoria Tarlac.

Matapos ang Misa sa isang Altar na walang bubong ay sinimulan na ang makasaysayang pagtutulungan ng mga kapatid sa K.A.L.K. Dahil sa pangungunang ito ng mga kapatid sa kalapit sangay, ay nabuksang muli ang diwa ng pagkakapatiran. Halos naging speechless dahil sa tuwa ang Pangulo ng Sangay Eufrocino Rigor.

Hindi lamang pagtatayo ng Templo ang naging tungkulin ng mga kapatid na dumalo doon. Pinagkaisahan din na mabigyang ng kahit kaunting tulong ang maysakit na anak ng pangalawang pangulo ng sangay Marcelo Gabriel Jr. na dagliang nakalikom ng kaunting halaga na pambili ng gamot.

Kahit mapagod na gawain ang pagkuha ng kawayan at pagbuo ng balangkas na paglalagyan ng bubong ay masayang naghihiwalay ang magkakapatid. Batid nila sa kanilang mga puso na walang ibang patutunguhan ang pagsusumikap nilang ito kundi tagumpay ng pagkakapatiran!

PAMUNUAN SA PAITAN NG BAGONG K..A.L.K.

 

“….pinagsadya namin, pinagsadya namin, kahit malayo man…..”

Ito ang masayang awit ng malugod na pagsalubong sa mga kapatid sa Paitan sa pagdalaw doon, ika-30 ng Nobyembre hanggang Disyembre 1, 2004.

Ginawa ang  pagdalaw upang maipagpatuloy ang ginagawang pagliliwanag ukol sa itinataguyod na Bagong K.A.L.K. Ang mga dumalaw ay binubuo ng Ktt. Pangulo G. Labarda at ilang matataas na bumubuo ng Ktt. Sanggunian at mga kasama.

Nagkaroon ng bukas na pag-uusap at maraming mga kapatid na bukas loob na nakapakinig sa pagpapahayag  ay malugod na tinanggap ang positibong hakbang na ito upang muling mabuklod ang kapatiran.

Matapos ang sama-samang panalangin o Misa ay  itinayo ang bagong pamunuan ng kanilang sangay sa pamamagitan ng halalan  ng mga  kapatid sa Templo Rizal Sgy Dr. Jose Rizal Blg.59,  Paitan, Sual Pangasinan.

Sa kagalakan sa muling pagkikita ng mga dating kasamahan sa Rekurida ay nag-alay ng awit si Nanay Carnay Enrique ng awiting “ Sa Pagbubukang Liwayway” Ipinamalas din naman ng kapatid Gabriel “Abe” Oabel (bagong halal na pangulo ng sangay)  ang kanyang angking galing sa pagtula na hindi nakatanggi nang siya ay mahilingan ng mga kapatid na naroon.

Pinasasalamatan ang pagtanggap ng mga kapatid  doon sa pangunguna ng kapatid Precy Ramuran.   Dinalaw rin si Nanay Ensiang (Florencia Cabrito) sa Bolaoen Sual  Pangasinan at nakipagkumustahan din sa kapatid na Arsing (Arsenio dela Cruz) ng Seselangin, Sual Pangasinan.

Sa kagustuhan ng mga kabataan doon na makapag-aral na magmisa ay nag-iwan ng kopya ng Misal si Obispa Juliet Veloso kay Apostolada Perlita R. Oabel.. Sa kaunting panahon na pagdalaw doon ay nakapagturo ng “ Ang Batang Mabait at Kaming Taga-Templo” at narinig ang mumunting tinig  sa pangunguna nina Shiela  at Marife,  Bagaman at may luha ay masayang naghiwa-hiwalay ang mga naliwanagang magkakapatid sa lalawigan ng Pangasinan.

SIPI 1 ISYU 2 DISYEMBRE 2004

(Graphic designs and manipulations by Artisfaction)

Sipi 1 Isyu 1 Nobyembre 2004

BAGONG K.A.L.K.

          Noong Sityembre 17-20, 2004 ay sinimulan ng tuparin ng Pamunuan ng Kapatiran Ang Likas na Kaliwanagan ang kanilang tungkulin na maiparating sa mga kapatid sa K.A.L.K. ang mga naging dahilan ng pagkakaroon ng bagong pangalan ng Pananampalataya ng K.A.L.K. Matapos ang bukas na usapan o open forum ng lahat ng mga kapatid, nasa kanila ng pagpapasiya kung paano tatanggapin ang ganitong pagbabago sa Kapatiran.

Naging mainit ang pagtanggap ng mga kapatid sa lalawigan  ng Tarlac sa balitang ito. Isang magandang balita na matapos maliwanagan ang kanilang mga isipan, matapos masagot ang lahat ng kanilang katanungan ay sinang-ayunan ng mga nakararaming kapatid sa lalawigang ito ang naging positibong hakbang ng mga anak ng dating Pangulo Obispa Salud Nuevo.

Magkahalong emosyon ang nadama sa muling pagrerekurida sa mga sangay na binuo ng mga magulang na Apong Angel Lorenzo at Obispa Salud Nuevo. Sa  tagal na panahon ay pinasalamatan nila ang muling pagdalaw sa kanilang sangay ng pamunuan ng Bagong K.A.L.K. Naluha sa sobrang katuwaan ang mga dating magkakaibigan na halos magkakapatid na ang turingan na matagal-tagal na rin hindi nagkita. Katuwaan sa bawat pagbabalik tanaw ng kanilang mga pinagsamahan sa loob ng kapatiran. Kung kaya’t sa oras ng pagpapaalaman ay hindi mapigil ang pagluha.

Ang Kataastaasang Sanggunian ng Bagong K.A.L.K. ay sina Gng. Gloria D. Labarda, Ktt. Pangulo; Gng. Estrella V. Nicdao, Ktt. Kalihim; Gng. Josefina C. Panlilio, Ktt. Ingat Yaman; Gng. Romana D. Javen, Puno ng Kagawaran; at si G. Francisco Samson, Imbestigador Heneral. Sila ang tumayong Incorporators ng Pananampalataya ng Kapatiran Ang Likas na Kaliwanagan na ipinatala sa Securities and Exchange Commission noong August 3, 2004.

Nanumpa ang Kataastaasang Sanggunian ng K.A.L.K. noong gabi ng bisperas ng paggunita sa kamatayan ng Kagalanggalang na Pundador, Supremo Angel Lorenzo na ginanap sa Templo Rizal sa Ilayang Dapdap Tayabas Quezon. (Ilayang Camaysa ang nakasanayang address ng kinatatayuan ng Templo Rizal. Nito lamang mga huling buwan napag-alaman na Brgy. Dapdap pala ang nakasasakop ng boonng konsistoryo ng Templo Rizal)
Sa pagrerekurida sa mga sangay sa lalawigan ng Tarlac ay ipinahayag ng Ktt. Pangulo Gloria Labarda na kailangang patatagin ang bawat mga sangay sapagkat matapos maiayos ang lahat ng kailangan ng bagong K.A.L.K. ay magkakaroon ng halalan ayon sa nakasaad sa Saligang Batas ng Pananampalataya. Inaasahan ang halalan ng pamunuan sa darating na pagdiriwang ng kaarawan ni Dr. Jose Rizal sa June 19, 2005 sa lugar na itatakda ng Ktt. Sanggunian upang makapili ang mga kapatid ng kanilang nais na sumunod na mamuno ng kapatiran.

Ipinahayag din na sa pagkakataong ito ang mga iba pang positibong hakbang na gagawin ng Bagong K.A.L.K.  sa pamamagitan ng nagkakaisang magkakapatid:

1. Tutukuyin ang mga naging kahinaan ng pagkilos ng kapatiran na naghantong sa pagkakawatak-watak ng mga magkakapatid ng sa gayon ay hindi na muling maulit ang ganitong pangyayari.
2. Sisimulan na ipaunawa sa lahat ng namumuno ang nilalaman ng saligang batas at lilinawin ang bawat kanilang tungkulin. Ang bawat pagkilos ng mga kapatid ay palaging naaayon sa saligang batas.
3. Papalakasin ang grupo ng kabataang K.A.L.K. at gagamitin ang kanilang makabagong mga ideya upang lalong umunlad ang Bagong K.A.L.K.
4. Pagbuo ng advisory council na pangungunahan ng mga magulang ng kapatiran na magsisilbing gabay na tagapayo ng Kapatiran.
5. Pagkakaroon ng grupo na ang pangunahing gawain ay ang pagsasaayos ng mge legal papers ng kapatiran. Sila ang makikipag-ugnay sa anumang ahensiya ng pamahalaan na nangangailangan ng taunang reports ukol sa K.A.L.K. atbp.

Naging maliwanag din sa mga kapatid na dumalo sa mga open forum na walang sinumang makapagbabawal sa paggamit ng mga Aklat Dasalan at Misal na sinulat ng dating Pangulo Obispa Salud Nuevo.

Niliwanang din ng Ktt. Pangulo Gloria D. Labarda na ang Templo Rizal ay tahanan ng Ktt. Ama ng Lupa at Kalangitan at kailanman ay hindi Siya nagtatangi sa Kanyang nilikha. Kaya ipinaalam sa lahat na ang Templo Rizal ng Kapatiran Ang Likas na Kaliwanagan ay laging bukas sa lahat.

Bagaman nakalulungkot ang pagkakaroon ng pagbabago ng pangalan ng kapatiran ay maluwag na tinanggap ng nakararaming kapatid na bukas loob na dumalo sa mga pagpapahayag na ginampanan. Mas mabuti ang ganitong pangyayari kaysa masaksihan pa ng mga susunod na kabataan ang walang tapos na salungatan na naganap sa ilalim ng pagkilos ng dating kapatiran, hayaang ang mga kapatid ang magpasya, kung saan ay malaya silang makapamimili ayon sa diwa ng kabanalan.

Malayang makagaganap ang magkabilang panig ng mga gampanin na nauukol sa pagdakila sa Ktt. Lumikha na siyang pangunahing layunin ng pananampalatayang binuo ng Kgg. Angel Lorenzo at Obispa Sallud Nuevo.

Sa Bagong K.A.L..K. ay muling ibabalik ang paggunita sa kamatayan ni Dr. Jose Rizal tuwing ika-30 ng Disyembre ng bawat taon. Ipagpapatuloy ang paggunita sa mga Dakilang Bayani ng lahi sa takdang araw ng kaarawan o kamatayan anumang araw ito matapat. Ipagpapatuloy din ang paggunita sa araw ng pagkatatag ni Apong Angel Lorenzo sa K.A.L.K. tuwing ika 13-14 ng Abril sapagkat ang araw na ito ang naging dahilan ng pagkakabulod ng mga kapatid sa Bagong K.A.L.K.

Ang lahat ng mga spiritual na pagkilos ay hindi magbabago: panalangin, Misa, dalit, awit na pambayan, na lahat ay sinulat ng dating Pangulo salud Nuevo. Magkakaroon lamang ng pagbabago sa mga pagkilos at patakaran ng  mga nanunungkulan na ngayon ay ibabatay nang lahat sa Saligang Batas ng K.A.L.K., Banal na Simulain, at Dakilang Alituntunin.

Bagong K.A.L.K., bagong pangalan, ngunit ipananatili ang tamis ng samahan ng mga magkakapatid na nagmamalasakit upang huwag masayang ang kabutihang itinanim ng mga magulan na nagbuklod sa kapatiran.

Katulad din ng rosas, pangalanan mo man itong gumamela o ilang-ilang o sampaguita o anupaman, ang katutubo at likas na tamis ng bango ng rosas ay mananatili anumang pangalan ang iyong itawag.

            Ang kahiwagaan ng Banal na Espiritu ay ipinakikilala sa atin sa pamamagitan ng mga nagaganap na pangyayari na sa unang saksi ay pangkaraniwan lamang at ang akala natin kaya naganap ay sapagkat ito ay bunga ng ating kaisipan, desisyon at pagkilos.

Ngunit may mga kaganapang hindi saklaw ng ating mga pagkilos at gawa, tulad ng ating buhay at kamatayan na nakaalam at may kagustuhan upang ito ay maganap ay ang Makapangyarihan sa lahat sa pamamagitan ng pagsasakatuparan ng Banal na Espiritu.

•  Una, sa pamamagitan ng pangkaraniwang pamamaraan kumakatok ang Espiritu upang gisingin ang ating mga damdamin at mamulat tayo sa isang Banal na simulain at katotohanan, ngunit madalas ito ay di natin pinag-uukulan ng pansin sapagkat  tayo ay abala sa ating araw araw na  pamumuhay.

• Sumunod, ang pagpapamalas ng Espiritu ng mga pangitain upang Siya ay ating mapansin ngunit patuloy napinagwawalang bahala.

• Ikatlo, sapagkat hindi maabala ang ating atensyon sa paghahanapbuhay at iba pang mga gawain, ang Espiritu ay nagsagawa ng mga pangyayari at kaganapan sa ating buhay upang mamulat ang ating isip at matuon ito sa Kanyang kabanalan at kahiwagaan.

• Ikaapat, kung sakaling makuha na Niya ang ating atensyon at mamulat ang ating isipan sa Banal na Simulain, Siya din ang magpapasya kung tayo ay talagang handa na, sa pagkatao at  kaalaman, upang biyayaan ng kaliwanagan at pagpapala ng Ama.

          DAHIL DITO, mga magulang at mga kapatid sa ilalim ng ating Bagong K.A.L.K. ihanda natin ang ating sarili, sa pamamagitan ngpagkakaroon ng  malinis na budhi at mapayapang loob sa mga kaganapan sa ating kapatiran.

Ang ating kapatiran na dumadakila sa kapangyarihan ng iisang Ama ang magpapakita sa atin ng kasagutan sa ating mga tanong, kaliwanagan sa ating mga pangamba at suliranin. Pagtuunan natin ng pansin ang Banal na Kautusan at Alituntunin ng K.A.L.K. sapagkat ito ang ilaw sa landas na ating tatahakin bukas  at tinatahak sa kasalukuyan. Pakinggan natin ang ating budhi, puso at damdamin upang mabuksan natin ang pagkatok ng Banal na Espiritu.

          Binabati ko ang pahayagan ng K.A.L.K. sa kanyang “maiden issue”. Harinawa’y maging matagumpay ang adhikain ng mga taong nasa likod nito.

          At sa wakas, tanggapin natin ang Kapangyarihan ng Ama sa Kanyang Banal na pagpapala at patnubay.

Diyos ay sumaatin. Pagpalain po tayo..

G. D. Labarda

Kataastaasang Pangulo

“…..pagkat itong tanda ay ang kabilinan

ay huwag gagawin ang palalong asal

ang  galing sa puso siyang babagayan

gayon ang natupad sa banal na kautusan…..”

          -Aklat Dasalan ng K.A.L.K.

          Upang turuan ang lalaking anak na mainitin ang ulo,nagbigay ang ama ng lalagyang puno ng pako. “Kapag nagagalit, huwag kang magsalita. Ibaon ang isang pako sa bakod.” Sumunod naman ito. Sa kanyang paglaki, napuno ng pako ang bakod, madalas humihingi pa siya ng dagdag. Malaunan, madalang na siyang magalit, at minsa’y walang ganang magbaon ng pako.

Sabi ng ama, “Anak tingin ko’y natutunan mo ng magtimpi. Ngayon iba naman ang iyong gagawin: Kung may nakasasakit sa iyo, sa halip na magalit at handa ka namang magpatawad, magtanggal ng isang pako dito sa bakod.” Sumunod ito. Halos natanggal nang lahat ang pako ngunit kahit tanggal na ang pako—hindi na maibabalik sa dating anyo ang bakod.

Masakit na salita’y parang pako, bumabaon sa puso ng tao. Maaaring humingi ng tawad at bumawi ngunit walang magagawa upang mabura ang mga butas na naiwan na.

Mahirap man gawin ang pagtitimpi, ngunit kailanman ay hindi nagkulang ang ating magulang sa K.A.L.K. ng pagpapaala-ala sa pag-iwas sa paggawa ng hindi mabuti sa kapwa.. Isapuso ang mga aral at isagawa. Nang sa ganoong paraan, ang bunga ng pananampalataya ‘y makikita sa iyo at magniningning ka sa mata ng iyong kapwa dahil sa iyong mabuting gawa.

Magsilbi sanang inspirasyon ang kuwentong ito sa panahong parang mahirap ang magtimpi, ng sa ganoo’y hindi ka makagawa ng mga bagay na hindi ayon sa iyong puso. (Kuwentong halaw sa Aklat na Lakbay Diwa ni Bella Abangan)

Larawan ng mga ilan sa nagsipagtrabaho upang maisakatuparan ng proyektong patubig para sa Templo Rizal Sgy. Pag-asa Brgy. Dapdap Tayabas Quezon.

QUEZON– Magandang balita para sa lahat ang pagkakaroon ng tubig sa Templo Rizal sa Ilayang Dapdap Tayabas Quezon.

Sinimulan ang matagal ng mithiing proyekto para sa Templo noong Hunyo taong kasalukuyan. Sa pamamagitan ng pakikipag-ugnayan sa lokal na pamahalaang barangay, Brgy. Captain Filemon Villanueva ng Bgry. Dapdap, at Brgy. Captain Aurelio Cabarrubias Jr. ng Brgy. Camaysa, mga Bantay Kalikasan sa pangunguna ni G. Luis Cabuyao, mga kapatid at kabarangay sa Brgy,. Camaysa Tayabas Quezon ay sinimulan ang paglalatag ng mga tubo mula sa halos limang kilometrong layo ng water source sa Templo Rizal.

Sa kagandahang loob ng pamilya ng yumaong Salud Nuevo at Severo Dava, sa inisyatibo  ng kanilang manugang na si  G. Oscar Labarda ay natupad ang pagpapatubig na ito. Mahigit sa dalawang daang libong piso ang iniukol nila sa proyekto para sa materyales na ginamit at bayad sa labor ng mga nagtrabaho.

Ganap na ika-9:02 ng umaga buwan ng Hulyo 15, taong kasalukuyan ay nalasap ang tamis ng tubig na ito sa Templo Rizal Sgy. Pag-asa Blg. 1 sa Ilayang Dapdap, Tayabas Quezon. Masayang nilinis ng mga anak ni Obispa Salud Nuevo at ilang mga apo ang loob ng Bahay Dalanginan na sa unang pagkakataon ay nadaluyan ng masaganang tubig. Ipinasok ang tubo sa loob ng Templo at sinimulan ang napakasayang paglilinis.

Kaugnay ng pagkakaroon ng tubig, ay sinimulan na din ang pagkakaroon ng maayos na palikuran (CR). Sa ngayon ay may dalawang toilet seats na unang nagamit noong pagtitipon sa paggunita ng kamatayan ng ating tagapagtatag Supremo Angel Lorenzo. Agosto 24-25.

Sa pagtitipon ding ito pinasinayaan ang patubig at matapos ang makasaysayang pasinaya ay nagkaroon ng isang masaganang salo-salo ang lahat ng mga magkakapatid.

Ang patubig na ito ay isang katuparan ng limampung taong pangarap ng ating mga magulang, dating Ktt. Kalihim Severo Dava at kanyang maybahay dating Ktt. Pangulo Obispa Salud Nuevo.  Ipinagpatuloy ng kanilang mga anak, handog sa lahat ng kapatid na nagmamalasakit sa kabutihang ipinamana ng kanilang pagtataguyod sa K.A.L.K.

TARLAC– Masayang ibinalita ng mga kapatid sa lalawigan ng Tarlac ang unang pagmimisa nila sa Templo sa Calingcuan Tarlac noong nakaraang Oktubre 9, 2004. Pinamunuan ng kapatid na Imelda Pangilinan ang pagmimisa na bagaman at kinakabahan ay hindi pa rin nabago ang ganda ng kanyang boses.

Kinabahan ang kapatid na Imelda Pangilinan sapagkat matagal ng panahon ang lumipas ng huling beses siyang magsuot ng sutana.

Sa kagandahang loob ng mga kapatid, nagkaroon ng bagong sutana ang kapatid na Imelda Pangilinan. Bumili ng tela ang kapatid na Aurea Frias at si Nanay Bosing Cordero naman ang nagtahi nito. Sabado ng gabi ay madaliang tinapos ang pagtahi ng sutana. Ang ensensaryong gagamitin ay bago rin na noong gabi rin lamang na iyon dumating buhat sa Maynila.

“Ay kasanting ng boses” (ang ganda ng boses!) pambungad ng kapatid sa Tarlac na tuwang tuwa sa pagbabalita. Nagkaroon pa sila ng kaunting salo-salo matapos ang sama-samang panalangin na dinaluhan ng mga nakararaming kapatid sa Tarlac.

       Ang muling pakikipag-ugnayan sa mga sangay na dinalaw sa lalawigan ng Tarlac ay sinimulan sa masayang pag-aawitan ng “Sa Aming Pagdating”, gawaing katutubo sa tuwing pagsasama-sama ng mga kapatid sa K.A.L.K. Narinig muli ang awit na ito na ikinatuwa lalo na ng mga magulang na nakasama dati sa rekurida ng dating Pangulo Obispa Salud Nuevo. Naging masayang gawain din naman ito na kinatuwaang pakinggan ng mga kabataang naroroon din.

Iminungkahi ng Ktt. Pangulo Gloria Labarda na palitan ang dalawang huling bahagi ng awit mula sa malulungkot na liriko na “maawa ka’t mahabag” na maging “magdiwang ka’t magsaya” at sa lirikong  “hirap” na naging “sikap”.

Abangan sa iba pang lalawigan ang muling paghimig ng awit na ito. Balik-sigla ang Kapatiran!

SA AMING PAGDATING

Awit na sinulat ni Obispa Salud Nuevo.

I

Sa aming pagdating (2x) Sa mahal ninyong harapan

Pinagsadya namin  (2x)  Kahit malayo man.

II

Kung itatanong mo  (2x) Ang pinanggalingan.

Bayan ng Tayabas, probinsya ng Quezon

Doon kami sumilang.

(ulitin ang I)

 ‘di ko alintana (2x) mga kahirapan

masayang mukha mo (2x) Makita ka lamang.

Ang tala’t bituin, nagbigay liwanag

Na pumapatnubay sa aming paglakad

Kung kaya’t sa ngayon  (2x) Magdiwang ka’t magsaya

Dine sa lagay namin  (2x) Sagana sa sikap.

Kaliwanagan Sipi 1 Isyu 1   Nobyembre 2004

(All graphic designs and manipulations are done by Artisfaction)